Околу 2000 луѓе во Пакистан протестираат против Франција



Околу 2.000 верници кои го славеа Мавлид, роденденот на пророкот Мухамед, излегоа на улиците во градот Лахоре во источен Пакистан.



Собраните, предводени од исламски партии, скандираа антифранцуски пароли, носеа транспаренти и ги блокираа главните патишта на патот кон храмот Суфи, јави АП.

Десетици луѓе бесно ги газеа знамињата на Франција и бараа бојкот на француските производи.

Во Мултан, град во источната пакистанска провинција Пенџаб, илјадници луѓе ја запалија фигурата на францускиот претседател Емануел Макрон и побараа Пакистан да ги прекине врските со Франција.

Подоцна денес се планираат неколку митинзи во Пакистан, вклучително и во главниот град Исламабад, каде е ангажирана полиција за да се спречат можните демонстрации пред француската амбасада.

Други исламистички протести се очекуваат низ целиот регион, вклучително и во Либан и Појасот Газа.

Во Авганистан, членовите на исламистичката партија Хезб-и-Ислами го запалија знамето на Франција.

Нејзиниот водач, Гулбудин Хекматиар, го предупреди Макрон дека ако не ја контролира ситуацијата, тие ќе одат во Трета светска војна, а Европа ќе биде одговорна.