Израелскиот премиер Бенјамин Нетанјаху денеска изјави дека неговата земја нема да биде обврзана со никаков договор што Вашингтон би можел да го постигне со Иран за неговата нуклеарна програма.

На овој начин Нетанјаху одговори на извештаите дека Вашингтон го обновил контактот со Иран.

Тој на почетокот на состанокот на парламентарната комисија за надворешни работи и одбрана рече дека со текот на годините Иран ги заменил арапските земји и сега е главната закана за Израел.

– Повеќе од 90 отсто од нашите безбедносни прашања доаѓаат од Иран и неговите сојузници, рече израелскиот лидер, споредувајќи ги со рак и додаде дека „Израел ќе продолжи да се брани“.

Тој, исто така, рече дека Израел се уште се противи на враќањето на првичниот нуклеарен договор од 2015 година, од кој САД се повлекоа за време на мандатот на поранешниот американски претседател Доналд Трамп.

– Работиме на тоа да го запреме Иран, а од друга страна правиме големи напори да го прошириме кругот на мирот. Овие работи за нас претставуваат големи предизвици, но и можности, рече Нетанјаху.

Израел не го прифати првичниот договор на Иран со светските сили и Нетанјаху лобираше против него.

Израелските лидери се спротивставија на напорите на Европа и американскиот претседател Џозеф Бајден да го оживеат и да го вратат Вашингтон во пактот.

Еврејската држава смета дека дипломатските напори нема да го спречат Иран да развие нуклеарно оружје.