Руските власти соопштија дека две лица загинале по, како што ја нарекуваат „вонредна состојба“ на мостот што го поврзува окупираниот полуостров Крим со Русија.

Како што пренесе Би-Би-Си, инцидентот не е наречен напад, но според непотврдени извештаи утрово се слушнале експлозии.

Мостот Керч беше отворен во 2018 година и овозможува автомобилско и железничко патување меѓу Русија и Крим – украинска територија што ја држат московските сили од 2014 година. Во октомври минатата година, тој беше делумно затворен по голема експлозија.

Мостот, кој е важен пат за снабдување, целосно беше отворен во февруари.

„Сообраќајот беше запрен на мостот на Крим. Вонредна состојба се случи во областа на 145-та поддршка од (руската страна на мостот)“, напиша на Телеграм шефот на руската администрација на Крим, Сергеј Аксјонов.

„Се преземаат мерки за обновување на ситуацијата. Ги замолувам жителите и гостите на полуостровот да се воздржат од патување преку мостот на Крим и од безбедносни причини да изберат алтернативен копнен пат низ новите региони“ додаде тој мислејќи на украинските територии што Русија ги окупираше минатата година и тврди дека ги анектирала.

Гувернерот на западниот руски регион Белгород, Вјачеслав Гладков на Телеграм информира дека две лица, родители на девојче, загинале во инцидентот – што тој, исто така, го нарече „итен случај“.

Руското Министерство за транспорт соопшти дека експлозијата не ги оштетила столбовите на мостот и оти била зафатена само површината на патот.

Би-Би-Си на руски јазик јави дека е затворен фериботот кој минува паралелно со мостот, додека руската државна медиумска агенција ТАСС го цитира локалниот железнички оператор дека може да биде засегнат и железничкиот сообраќај.