Навивачите и управата на Олимпик Марсеј одржаа состанок за кој француските медиуми пренесуваат дека поминал во крајно тензична атмосфера. Приврзаниците на клубот побарале оставки од клупските челници.

По пет одиграни првенствени натпревари, Марсеј заостанува два бода зад лидерот Монако, а незадоволството на навивачите го засили ремито против Тулуз изминатиот викенд. Претходно беше договорена средбата меѓу управата на клубот и навивачите.

Пабло Лонгорија (претседател на клубот), Хавиер Рибалта (спортски директор) и Педро Ириондо (извршен директор на клубот) се појавија пред навивачите и потврдија дека не се задоволни од играта на тимот, но навивачите беа оние кои го водеа главниот збор.

„Се срамиме“, „Не не почитувате“, се пораките кои навивачите ги упатија до управата, критикувајќи го фудбалот што го игра тимот оваа сезона. Тие побараа од челниците на клубот веднаш да поднесат оставка. Се наведува и дека управата останала без зборови и дека состанокот кратко траел, а завршил така што навивачите станале и ја напуштиле просторијата.