Поради нападот на експедицијата во Лион и повредата на тренерот Фабио Гросо, француските фудбалски клубови сега поинаку гледаат на гостувањето во Марсеј.

Лил е следниот ривал на Олимпик Марсеј и токму од овој клуб побараа безбедносни гаранции за својата експедиција.

Претседателот на Лил, Оливие Летанг му пиша на првиот човек на префектурата Буш-де-Рон, на која и припаѓа Марсеј, и побара од него да ја гарантира безбедноста на гостинските играчи и стручниот штаб за време на нивниот престој во градот.

Летанг, како и целата француска јавност, се во шок откако симпатизерите на Олимпик Марсеј го каменуваа автобусот во кој беа играчите и стручниот штаб на Лион и му нанесоа сериозни повреди на тренерот Фабио Гросо.

Сликата од неговото раскрвавено лице го обиколи светот.

Претседателот на Лил испрати писмо со иста содржина до полицискиот комесар на префектурата Буш-де-Рон Фредерика Камилери, министерката за спорт Амели Оуде-Кастера, министерот за внатрешни работи Жералд Дарманин, претседателот на Олимпик Пабло Лонгорија и претседателот на Лига 1 Винсент Лабрун.