Заев: Да му покажеме на светот дека секој договор, секое пријателство, секое ракување, носи бенефит за граѓаните



Заев: Да му покажеме на светот дека секој договор, секое пријателство, секое ракување, носи бенефит за граѓаните - МИА

Атина, 16 септември 2020 () – Ќе се обидам да ги охрабрам лидерите од соседите, но и тука во Грција, лидерите од Владата, од Парламентот и претседателката на земјата, во Северна Македонија да видат добар партнер за иден развој, рече премиерот на Северна Македонија Зоран Заев за време на панел дискусијата посветена на Западен Балкан во рамките на конференцијата на „Економист“ и додаде дека лично за него, многу е важно „да му покажеме на остатокот од светот, особено за регионот од Југоисточна Европа, дека секој договор, секое пријателство, секое ракување, носи бенефит за граѓаните“.

Како што јави дописничката на од Атина, македонскиот премиер, говореше за односите со Грција, но и со останатите соседи, за ситуацијата кај нас, за европската перспектива на регионот, како и за денешните средби со грчкиот државен врв.

– Се чувствувам како да е исполнување на мојот сон, да дојдам во Атина да разговарам за бизнис, да разговарам за соработка, да разговарам за споделување на искуства. Навистина сум многу среќен, бидејќи сето она што се случи минатите неколку години на Западниот Балкан, верувам дека е некој вид на специјален фокус на Западниот Балкан, за кој нема алтернатива освен членството во ЕУ и НАТО и дека стратегијата за сите земји нѐ води да направиме реформи во нашите земји, да го подобриме квалитетот на животот за нашите граѓани, да градиме добри пријателства, а преку овие пријателства го сменивме Балканот, сѐ повеќе стануваме Европејци, рече Заев.

Во однос на денешната средба со неговиот грчки колега тој објасни дека ќе разговараат за следните чекори во соработката, една од темите ќе биде и избегнувањето на двојното оданочување, заштита на инвестициите, но и Договорот од Преспа.

– По нашите избори, треба да продолжиме да разговараме за да најдеме начин како да ги решиме бренд имињата на продуктите. Во октомври, коморите од Грција, од Солун и Атина ќе бидат во Скопје за да разменат идеи, а потоа експертската група ќе продолжи за да најде решение за тоа, рече Заев и изрази надеж дека и комисијата за учебниците набргу ќе најде решение.

Премиерот истакна дека по договорите со Бугарија и Грција, Северна Македонија е земја што разви огромно пријателство со сите соседи, а говорејќи за европската перспектива објасни дека нашата земја, заедно со Албанија, очекува во декември да почне преговори со Европската Унија и додаде дека германското претседателство и канцеларката Меркел се посветени на овој процес.

Паралелно, тој спомена дека и улогата и помошта на Грција се важни на патот на Северна Македонија и Албанија кон ЕУ.

За тоа колку време би требало за Северна Македонија да стане полноправна членка на Европската Унија, Заев рече дека имаме реални очекувања и процесот ќе трае онолку колку што е потребно.

– Пет, седум, десет години. Зависи од нас, но зависи и од Европската унија колку е фокусирана на Заладниот Балкан, рече Заев и додаде дека прашањето, „не е да бидеме членки на Европската Унија, само за да бидеме во ЕУ, туку Европа да ја внесеме во внатрешната на Северна Македонија“.

На панелот, македонскиот премиер се задржа и на економската ситуација во Северна Македонија, но и на трговските односи со Грција, кои бележат раст од 20 отсто по Договорот од Преспа, истакнувајќи дека граѓаните и бизнисмените ја следат позитивната клима и изрази надеж дека по кризата со коронавирусот ќе продолжи да се зголемува трговската размена со јужниот сосед.

Заев истакна дека „политичарите може да победат на избори по драматични, историски, тешки одлуки“ и објасни дека се решени сите домашни порашања, потенцирајќи дека „Северна Македонија, сега е држава без отворени прашања во внатрешноста“.

На вториот ден од конференцијата на „Економист“, на панел дискусијата заедно со Заев учествуваа и премиерот на Албанија Еди Рама и поранешните министри за надворешни работи на Грција, Дора Бакојани и Јоргос Катругалос, кои сега се пратеници од Нова демократија, односно СИРИЗА.

Пред почетокот на панелот, учесниците имаа кус неформален разговор заедно со заменик-претседателот на Владата задолжен за европски прашања Никола Димитров и амбасадорот на САД во Атина, Џефри Пајат.


Вести

Седум града со над 100 активно заразенни со коронавирус

Во моментов во земјава како активни се водат 2.323 случаи на заразени со коронавирус. Од нив, во седум македонски градови има над 100 заразени. Најмногу активни случаи има во Скопје (684), по што следат Куманово […]

Бизнис и економија

Осумте банки заинтересирани за соработка со Пошта до крајот на месецот треба да достават понуди

– До крајот на месецот банките кои изразија интерес да го вршат платниот промет во единиците на Пошта треба да одговорат на писмото што го испрати Пошта до нив за условите што ги нудат, по […]

Субвенции од државата за плати досега побарале 12.380 компании - МИА
Вести

Четврти сет мерки – 470 милиони за поддршка на граѓаните и стопанството, според опозицијата Христијан Мицкоски, четвртиот пакет е задоцнет

– Преку нов пакет економски мерки вреден 470 милиони евра Владата ќе се обиде во третиот квартал од годинава да го спречи падот на БДП од вториот квартал и со зголемена економска активност и јавна […]

Биди првиот кој ќе коментира

Вашиот коментар

Твојата е-маил адреса нема да биде објавена.


*