Заев од средбата со врвот на Светската шаховска федерација: Шаховската федерација на Република Македонија ја има поддршката од Владата за организација на идните меѓународни првенства


Претседателот на Владата на Република С. Македонија Зоран Заев прими делегација на Светската шаховска федерација (FIDE) предводена од претседателот на федерацијата Аркадиј Дворкович, што е во посета на нашата земја по повод 36-тиот Европски клупски куп (ЕКК) во шах, што се игра Струга.


 

Премиерот Заев на средбата, на која присуствувал и директорот на Агенцијата за млади и спорт, Наумче Мојсовски, истакнал дека во рамки на спортската дипломатија заложбата на Република С. Македонија е да биде домаќин на што поголем број меѓународни спортски и шаховски настани, со цел да ги поддржи врвните остварувања во сите спортски дисциплини и во шахот.

– На средбата беше нагласено дека Владата е подготвена да ја даде потребната поддршка на Шаховската федерација на Република. Македонија како организатор на идните меѓународни шаховски првенства, се наведува во денешното соопштение од владиниот Сектор за односи со јавноста.

За време на средбата, на која присуствувале и претседателот на Европската шаховска федерација Зураб Азмаипарашвили, извршната директорка на FIDE Дана Озола, претседателката на Шаховската федерација на Македонија, Александра Гакидова и шаховскиот велемајстор Роландо Кутиров, станало збор и за системското вклучување на шахот во образованието, за што од Светската шаховска федерација се подготвени да ја дадат неопходната поддршка.