Министерот за надворешни работи Бујар Османи денеска имаше телефонски разговор со новоименуваниот министер за надворешни работи на Грција, Јоргос Герапетритис.

Честитајќи му за именувањето на новата позиција, Османи изрази уверување дека и за време на неговиот мандат ќе продолжи стратешкото партнерство и плодната соработка со Грција, заснована на пријателство, меѓусебна доверба и разбирање, соопшти МНР.

Во фокус на разговорот беше билатералната соработка, при што беа реафирмирани заедничките заложби за унапредување на блиската соработка и одржувањето на позитивната динамика во односите и севкупната размена.

– Благодарни сме на Грција за цврстата и принципиелна поддршка за пристапниот процес за членство на нашата држава во Европската унија, нагласи Османи, пренесувајќи ја убеденоста дека поддршката нема да недостига и во наредниот период, се до целосно и успешно завршување на европскиот интегративен процес.

Министрите разговараа и за најактуелните регионални и меѓународни теми, како и соработката во рамките на и ОБСЕ и Процесот за соработка во Југоисточна Европа, со кои претседава  Македонија.