Напредокот во однос на евроинтеграцискиот процес на Македонија и огромната поддршка на Словенија како билатерален партнер на нашата држава во процесот на спроведување на реформите, беше во фокусот на разговорите на премиерот Димитар Ковачевски со словенечката претседателка Наташа Пирц Мусар, која е во официјална посета на државава.

Во состав на македонската делегација беа присутни министерот за земјоделство, шумарство и водостопанство, Љупчо Николовски, министерот за образование и наука, Јетон Шаќири и министерот за информатичко општество и администрација, Азир Алиу.

-Македонија се наоѓа во пресвртен момент од историјата којшто бара да покажеме лидерство и обединување на сите политички актери во Парламентот, рече премиерот Ковачевски на средбата, изразувајќи надеж дека и овој пат нашата држава ќе застане на вистинската страна од историјата со поддршка од нашите стратешки партнери и долгогодишни пријатели, меѓу кои и Словенија.

Како што соопшти владината прес-служба, Ковачевски, исто така го истакна фактот што Македонија и Словенија се пријателски земји, без отворени прашања, а билатералните односи се базираат на традиционално долгогодишно пријателство.

Во таа насока, заеднички беше поздравено неодамнешното потпишување на заедничката Декларација за зајакнување на соработката меѓу Република Македонија и Словенија, за што беше потенцирано дека несомнено ќе придонесе кон понатамошно интензивирање на билатералната соработка.

Двете страни го потенцираа и големиот напредок на  Македонија на регионален план, кадешто нашата држава е препознаена како кредибилен партнер на Европската Унија и НАТО во обезбедување на регионалниот мир и безбедност.

Словенечката претседателка, Пирц Мусар истакна дека  Македонија може да смета на цврстата поддршка на Словенија бидејќи местото на нашата земја и земјите од Западен Балкан е во големото европско семејство.