Неизвесно е кога собранискиот спикер Талат Џафери ќе ја закаже седницата за уставни измени, но кога тоа ќе го направи, тоа ќе значи дека власта е блиску до мнозинство. Ова го соопшти вицепремиерот за евроинтеграции, Бојан Маричиќ, според кого, постојат два начини да се стигне до мнозинство во Собранието.

„Седницата ќе биде закажана кога ќе има услови. Ние работиме на услови за успешно гласање во Собранието. Кога ќе закажеме седница тоа ќе биде индикатор дека сме приближени кон мнозинство. Мислам дека поддршката оди кон 72/73 пратеници“, рече Маричиќ.

Тој додаде дека се работи на обезбедување на мнозинство.

„Постојат два начини. Едниот начин ВМРО-ДПМНЕ како политичка партија да даде поддршка под одредени услови кои беа разговарани и на лидерската средба од пред два месеци. Вториот начин е дел од пратениците одлучат да гласаат за овие уставни промени како пред пет години за претходните уставни промени. Јас не гледам трет начин, но тие се двете опции. Ние ќе работиме на двете нивоа. Сметам дека не е невозможно, туку дека е возможно и дека имаме време и простор да разговараме и да дојдеме до решение“, додаде Маричиќ.

Посочи дека е рано да се каже дали ќе биде донесена одлука за Албанија да преговара со ЕУ, без Македонија.

„Возможно е до крајот на ноември да се комплетираат уставните измени. Не знаеме дали до крајот на заклучоците, ќе се носат одлуките за проширување и свикување на наредните меѓувладени конференции. Прерано е да се каже дека уште сега ќе се донесе одлука за Албанија а за нас нема“, посочи Маричиќ.