Средствата од учеството на годинашното издание на традиционалната манифестација џип-рели „Офф Роад Осогово” во Крива Паланка организаторот ги додели на семејство во социјален ризик од кривопаланечкото планинско село Нерав.

-На годинашното издание на џип-релито што ги промовира убавините на Осоговските Планини учествуваа над двесте учесници, а бидејќи релито има ревијален карактер, средствата не се користат за награден фонд, така што, како организатори, недвојбено одлучивме дека средствата ќе бидат добредојдени некому што навистина се потребни. Во координација со Општинската организација на Црвен крст Крива Паланка заедно решивме да помогнеме на семејство во социјален ризик од селото Нерав, информира Михаил Јовановски од „Офф-роад Осогово”, Крива Паланка.

Тој додаде дека станува збор за семејство со три малолетни деца во кое се очекува принова со близнаци, а родителите се невработени.

Секретарот на Општинската организација на Црвен крст Крива Паланка, Дарко Пешовски, посочи дека ваквиот начин на соработка со локалните институции и организации за помош и поддршка на ранливи категории граѓани е вистински пример за тоа како треба да се дејствува во насока на помош и поддршка на заедницата.