Собранието денеска го усвои Законот за Националната развојна стратегија со поддршка на пратениците од власта и опозицијата од речиси сите политички партии кои се застапени во законодавниот дом.
Како што соопштуваат од прес-службата на Владата, ова го отвора патот за усвојување и на текстот на најсеопфатниот стратешки документ од осамостојувањето на државата, во кој се дефинирани главните цели и мерки за развојот на Република Северна Македонија во наредните 20 години.
„Националната развојна стратегија (НРС) претставува комплексен документ кој опфаќа економски, социјални, еколошки и културни аспекти на развојот на нашата држава. Процесот на подготовка на стратегијата траеше речиси три години и во него директно се вклучија околу 14.000 граѓани, повеќе од 250 претставници од национални институции, 70 градоначалници, 50 пратеници од власта и опозицијата, претставници на стопанските комори, граѓански организации, над 500 претставници од маргинализирани и ранливи групи, како и повеќе од 1.000 млади и членови на младински организации.
Предлог законот за Националната развојна стратегија беше првично поднесен од група пратеници – Арбер Адеми, Атнан Незири, Диме Велковски, Јован Митрески, Љупчо Пренџов и Никола Мицевски, и во прво читање беше усвоен на седница на Собранието на Република Северна Македонија на 22 декември 2023 година. Потоа, беше ставен на дневен ред за разгледување во матичното тело и ставен на ред за разгледување на 135-та седница на Собранието. Со обезбедено позитивно мислење од Владата, предлог законот беше разгледан од Комисијата за економски прашања, по што денеска е донесен од Собранието со консензус на сите присутни пратеници“, соопштуваат од прес-службата на Владата.
„По усвојувањето на финалниот текст на НРС, ќе се започне со имплементација на стратегијата што треба да придонесе за подобрување на голем број процеси во државата и подигнување на квалитетот на живот на граѓаните.
Креирањето на Националната развојна стратегија, Владата на Република Северна Македонија го реализира во партнерство со Канцеларијата на постојаниот координатор на Обединетите нации и Програмата за развој на Обединетите нации – УНДП. Изработката на НРС е финансиски поддржана од Британската амбасада во Скопје и од Министерството за финансии на Република Словачка“, се додава во соопштението на прес-службата на Владата.
