„Сименс“ и „Дојче Бан“ развиваат возови на водород



ript>


 

Германскиот индустриски гигант „Сименс“ и „Дојче Бан“ започнаа со развој на возови со горивни ќелии и станици за полнење, кои ќе бидат тестирани во 2024 година како дел од планот за замена на дизел моторите на германските железници.

Прототипот ќе го гради „Сименс“ и ќе се базира на електричниот вагон „Мирео Плус“, кој ќе биде опремен со горивни ќелии за претворање на водород и кислород во електрична енергија, соопштија двете компании.

Извршниот директор на „Сименс мобилити“, Мајкл Питер, објасни дека возовите ќе комбинираат можност за напојување од три извори во модуларен систем – батерии, горивни ќелии и постечкото надземно напојување, во зависност од тоа каде ќе сообраќаат.

Германската железничка компанија „Дојче Бан“ сè уште нема електрифицирано 40 проценти од мрежата со вкупна должина од 33.000 километри, која ја користат 1.300 дизел локомотиви.

„Нашите возови на погон на водорот ќе можат долгорочно да ги заменат дизел возовите“, рече Питер.

Новиот прототип ќе се полни за 15 минути и ќе има опсег од 600 километри до следното полнење, како и максимална брзина од 160 километри на час.

Локомотивите ќе бидат тестирани на линиите помеѓу Тибинген, Хорб и Пфорцхајм во сојузната покраина Баден Виртемберг.

„Главниот целен пазар се регионалните мрежни оператори, кои обично имаат меѓу 10 и 50 возови“, објасни Питер.

„Гледаме пазарен потенцијал од 10.000 до 15.000 возови што треба да се заменат во Европа во следните 10-15 години, од кои 3.000 само во Германија“, рече тој.