Во среда на 28 јуни 2023 година, во 20:00 часот, во Галеријата на Факултетот за ликовни уметности ќе се отвори првата самостојна изложба „Портрети“ на академската сликарка Марта Патлиџанковска. Изложбата ќе биде отворена до 7 јули.

На изложбата Патлиџанковска се претставува со ликовни решенија — платна со големи димензии, работени во комбинирани техники, во кои доминира експресијата на бојата. Со динамични и експресивно груби потези на четката, пастуозно ,,чкрабање“ на површината со боја директно од туба и употребата на спреј, Патлиџанковска ја зголемува острината на потегот, така што целокупната содржина трепери и делува вибрантно. Воодушевена од колористичките експерименти, без однапред утврден концепт и дефинирана идеја, создава смели ликовни решенија кои ѝ припаѓаат на реалистичката ликовна сфера, со асоцијативен и симболички призвук. Така, лексиката на нејзиното сликарство ја наоѓаме во симбиозата на фантазијата и јавето, во сферата на свесното и потсвесното.

Марта Патлиџанковска е родена во 1999 година во Скопје. Во 2022 година дипломира на Факултетот за ликовни уметности во Скопје, на Катедрата за сликарство, во класата на Жанета Вангели.