Книжевна вечер на писателката Ана Багријана во КИЦ на Македонија во Софија


Во КИЦ на Република Македонија во Софија се одржа книжевна вечер со писателката и преведувачка Ана Багријана. Таа е поетеса, романсиер, драматург, преведувач од Украина, родена во 1981 година во Фастов, Киевската Област.


 

Настанот почна со едноминутно молчење за загинатите стари лица во селото Ројак во Бугарија и за 45-те македонски државјани кои загинаа на 23 ноември во сообраќајна несреќа на автопатот „Струма“. Директорот на Културно-информативниот центар на Република Македонија во Софија Сашко Насев се заблагодари за букетите, електронската пошта и сочувството што граѓаните на Бугарија го изразија во КИЦ по повод несреќата минатата недела.

Како што јави дописникот на МИА од Софија, меѓу гостите беше и Виталиј Москаленко, кој е амбасадор на Украина во Бугарија и поранешен украински амбасадор во Македонија. Амбасадорот Москаленко пред присутните рече дека Ана Багријана на многу добар начин ја поврзува Македонија со Бугарија и Украина и дека духовноста и литературата треба да нè  поврзуваат сè  повеќе, бидејќи тоа се вистинските мостови меѓу државите.

На културната вечер присуствуваа голем број дејци и претставници на културниот живот на Софија. Книжевниот критичар и издавач Пламен Тотев ги претстави делата на Ана Багријана и рече дека културните врски меѓу Бугарија, Македонија и Украина се важни за словенската заедница.

-Има многу заеднички мотиви меѓу трите земји, симболи кои ги обединуваат, додаде Тотев.

Ана Багријана претстави дел од своите песни на украински и на македонски јазик, а водителот на културната вечер, актерот Георги Георгиев-Атина, се претстави и на бугарски јазик. Багријана рече дека многу нешта ја поврзуваат со Македонија, не само кога живеела во Скопје, туку и културните врски што ги зачувала со неа. Рече неодамна нејзината книга е објавена во издание на „Македонска реч“.

На литературната вечер присуствуваа само оние кои претходно се пријавиле и имаа потврди за вакцинација или за прележеност од Ковид-19. Поставените услови се со цел да се почитуваат мерките за справување со пандемијата, појаснија од КИЦ на Македонија.