Исмаил Кадаре ја доби наградата „Прозарт“ 2020 на фестивалот „ПРО-ЗА Балкан“


Исмаил Кадаре ја доби наградата „Прозарт“ 2020 на фестивалот „ПРО-ЗА Балкан“ - МИА

Скопје, 11 јуни 2020 () –  Наградата „Прозарт“, која Интернационалниот литературен фестивал „ПРО-ЗА Балкан“ му ја доделува на истакнат автор за придонес во развојот на книжевноста на Балканот, во 2020 година му припадна на големиот албански писател Исмаил Кадаре за неговиот импозантен повеќедецениски романсиерски и есеистички опус, кој е највисоко оценет и од  европската и светската критика.



Поради неможноста фестивалот да се одржи во вообичаениот термин на крајот на мај, лауреатот ја доби наградата, која се состои од статуетка и паричен дел, во неговиот дом во Париз. Организаторите најавуваат дека осмото издание на фестивалот ќе се одржи наесен.

-Со голема чест му ја доделуваме наградата „Прозарт“ на писателот кој ги одбележа втората половина на минатиот век и почетокот на новиот век со провокативноста и компактноста на неговите книжевни остварувањa, стои во образложението на одборот за доделување на наградата „Прозарт“.

Одборот на наградата, кој го сочинуваат: Ермис Лафазановски, претседател, Александар Прокопиев и Дејан Трајкоски, членови, наведува и дека „непомирлив во однос на чесноста на писателскиот, но и интелектуален став со непресушен имагинативен капацитет, Кадаре постојано низ половина век творештво ги изненадува познавачите на литературата со високо литерарна разработка на теми во кои содејствуваат локалното и универзалното“.

Тој е автор на наслови кои се познати и во светот,  меѓу кои „Генералот на мртвата војска“, „Тврдина“, „Трострелниот мост“, „Пирамида“, „Наследникот“… Тие се тематски различни и во однос на времето и просторот кои се обработуваат, но многу сродни во однос на етичките и стилски суштествени одлики на писмото на Кадаре.

Организаторите на фестивалот „ПРО-ЗА Балкан“  соопштија и за благодарноста на Кадаре за признанието фестивал „ПРО-ЗА Балкан“

– Се натажив што нема да можам да ја прифатам поканата на фестивалот за лично да ја примам наградата која љубезно ми ја доделивте, но поради моменталната пандемија, се надевам дека ова писмо на благодарност од далечина е доволно, истакнал Кадаре.